Svæðið

Vinsælustu skíðaleiðirnar í Bláfjöllum eru Norðurleiðin og Kóngsgilið. Hægt að komast í þær með bæði Kónginum (nýja stólalyftan) og Drottningunni (gamla stólalyftan). Við Kónginn er einnig Lilli Klifurmús (Borgarlyftan) og Brettalyftan fyrir Mohawk’s parkið. Fyrir ofan Bláfjallaskála eru byrjendalyfturnar Amma Mús og Hérastubbur, ásamt leiktækjum fyrir börn. Fyrir neðan Bláfjallaskála eru auðveldustu brekkurnar fyrir byrjendur með Töfrateppið og kaðallyftuna Patta Broddgölt og eru þær gjaldfrjálsar.

Sunnar komum við svo að Sólskinsbrekku og Suðurgili. Í Sólskinsbrekku er toglyftan Mikki refur, byrjendalyftan Kormákur Afi, tvíburalyfturnar Jón Oddur og Jón Bjarni og byrjendalyftan Amma dreki. Auðvelt er að komast á milli Sólskinsbrekku og Kóngsgils með því að fylgja troðinni braut sem tengir svæðin, eða með kaðallyftunni Bangsadreng sem er við Mikka Ref.

Skíða- og brettafólk

Fyrir byrjendur mælum við einna helst með að halda sig í nágrenni skálanna, þar sem auðveldustu lyfturnar eru.

Við Norðurleiðina er Mohawk’s Parkið sem er snjógarður með stökkpalla fyrir snjóbretta- og freestyle skíðafólk. Hægt er að komast að ofanverðu úr Kónginum og Drottningunni, og svo er sér toglyfta sem þjónustar snjógarðinn.

Við viljum hvetja alla til að fara varlega í snjóhengjum sem eru utan hins skipulagða skíðasvæðis vegna snjóflóðahættu.

Samkvæmt öryggisreglum skíðasvæða á brettafólk alltaf að vera með annan fótinn fastan í lyftunum og aldrei má láta bretti eða skíði renna frá sér.

Slys og óhöpp

Ef þið verðið vitni að slysi á skíðasvæðinu gefið ykkur sem fyrst fram við starfsmenn, eða hringið í 112 og sérþjálfaðir vettvangsliðar munu bregðast við.

Minniháttar meiðsli meðhöndlum við fúslega í Bláfjallaskála, en þá er gengið inn um starfsmannainngang á norðurgafli hússins. Starfsmönnum okkar er ljúft og skylt að veita þá aðstoð sem þeir eru færir um að veita hverju sinni.