Þá er ótrúlegur vetur að baki í Bláfjöllum.  Vetur sem reynslumestu einstaklingar héldu að myndi aldrei koma en hann kom.  Það er náttúrulega einstakt að það komi varla náttúrulegt snjókorn vetrarmánuðina sjálfa, nóvember, desember, janúar og nánast allan febrúar.  Og ekki nóg með það, hitastigið þessa mánuði var það hátt að nánast aldrei gaf til snjóframleiðslu.  Tvisvar sinnum í vetur, um miðjan desember og um miðjan janúar var nánast búið að framleiða upp allar þær leiðir sem við höfum snjóframleiðslu til en í bæði skiptin brast í hláku og allt skolaði burt.
Enn eitt árið sannast mikilvægi snjóframleiðslunnar þó það hafi sannarlega ekki verið eins augljóst og síðustu tvo vetra.  Þá sannaðist einnig mikilvægi snjógirðinga og landmótunar.  Í sumar var farið í verulega landmótun í Gosa ásamt nýjum snjógirðingum.  Gosinn var fyrsta lyfta á svæðinu til að opna á svæði sem ekki er undir snjóframleiðslu.  Hún opnaði á 7 degi almennrar opnunar eða 1. mars.  Almenn opnun hafði fram að því verið í boði snjóframleiðslunnar.

Í vetur var opið í 31 dag.  54.855 gestir fóru í gegnum aðgangshlið lyftna og 294 gestir fóru í gegnum aðgangshlið skíðagöngusvæðis.

Það má vel við  una eftir þennan skrítna vetur þar sem snjór lét ekki sjá sig fyrr en í lok febrúar.